Gumminn okkar sigraði "Duke of York"

Guðmundur Ágúst: „Stærsti sigurinn á ferlinum"

„Ég er orðlaus, veit varla hvað ég á að segja," sagði Guðmundur Ágúst Kristjánsson, kylfingur úr GR eftir frábæran sigur á Duke of York meistaramótinu sem lauk í dag á Royal St. George‘s golfvellinum í Englandi. Sigurinn hjá Guðmundi er frábær enda eru nær allir af bestu kylfingum undir 18 ára aldri í Evrópu samankomnir í þessu móti sem Andrew Prins stendur að.

„Þetta er klárlega minn stærsti sigur á ferlinum. Ég var að slá mjög vel með járnunum þrátt fyrir að ég væri ekki að pútta vel á fyrri níu holunum. Ég datt í gang á seinni níu holunum og var að setja niður mörg góð pútt," sagði Guðmundur sem byrjaði ekkert sérstaklega á lokahringnum eftir að hafa verið með tveggja högga forystu.

Guðmundur háði einvígi við Írann Dermont McElroy um sigurinn í mótinu en þeir léku saman á lokahringnum. Guðmundur missti forystuna á níundu holu þegar hann fékk þrefaldan skolla og því hafði McElroy þriggja högga forystu fyrir seinni níu holurnar. Á 14. holu fékk McElroy tvöfaldan skolla en Guðmundur par og því var jafnt fyrir lokaholurnar.

Guðmundur fékk frábæran fugl á 16. holu og náði þar með forystu sem hann lét ekki af hendi þrátt fyrir vandræði á 18. brautinni. Hann missti teighöggið í hátt gras og í stað þess að taka áhættu sýndi Guðmundur gríðarlega skynsemi þegar hann lagði upp og sló svo þriðja högginu um tvo metra frá holunni. Hann setti svo niður púttið fyrir pari og tryggði sér sigurinn í mótinu. Frábær sigur hjá Guðmundi sem hefur leikið frábærlega í sumar og var valinn í landslið Íslands sem keppir á HM í október.

„Að setja niður lokapúttið var frábært. Ég vissi allan tímann að ef ég myndi setja niður púttið þá myndi ég vinna mótið. Að vinna þetta mót á þessum velli er ótrúlegt," sagði Guðmundur en Opna breska meistaramótið verður leikið á Royal St. George‘s vellinum á næsta ári.

Margir þekktir kylfingar hafa tekið þátt í þessu móti og má nefna að Rory McIlroy varð í öðru sæti í mótinu árið 2004. Magnús Lárusson úr GKj varð í öðru sæti í mótinu árið 2003.

Lokastaðan í mótinu

Myndir/Stefán Garðarson: Guðmundur Ágúst tók við bikarnum úr hendi Hertogans af York, Andrew Prins.